De Iiwohnerrot het es sich in Sache Budget au i dem Johr ned eifach gmachd. Allein d Budgetdiskussion het öppe föif Stund in Aaspruch gnoh.
Vo de Sibni am Abe bis nachts um Viertelabeis esch d Sitzig vom Iiwohnerrot am Donnschtig, 12. November 2020 gange. Erscht zum Schluss isch d Abstimmig gsi, ob de Stüürfuess uf 95 % sell bliibe, wie vom Gmeindrot nach de Diskussione am Runde Tisch vorgschlage, oder uf 98 % söll stiige.
Vorher het de Rot alli mögliche Kürzigs- und Widerufstockigsaaträg behandled. Bsunders z bemerke esch, dass die meischte Aaträg abglehnt worde sind, au die vo de Finanzkommission. Zum Schluss sind es e chli meh wi 12’000 Franke gsi, wo me us em Budget vom Gmeindrot usegstriche het.
Bi de Abstimmig über de Stüürfuess isch es denn chnapp gsi. De Thomas Benz (CVP) het ufzeiged, wi tüüf d Beträg bi föifenünzg Prozent vo de Stüürpflichtige wäred, we de Stüürfuess uf 98 % würd stiige. Unterstützig het er us de Mitti und vo links übercho, aber au uf de rächte Sitte vom Rot het es Lüt geh, wo de finanzpolitische Realität hend welle ins Aug luege. Zum Schluss het sich aber de Stüürfuess vo 95 % mit 21 gege 20 Stimme bi drü Enthaltige duregsetzt.
Am 20. Dezember chond de Vorschlag vors Volk.