D Wystern AG Wettige isch im 21. August 2019 vo 16 Winzer und 593 Aktionär gründ worde. Am Donnschtig, 28. Oktober 2021 isch di erschti ordentlich GV gsi.
Mit de Gründigsversammlig und de ertragriche Ernte (öppe 40 Tonne) im 2019 isch d Wystärn AG guet us de Startlöcher cho. Corona het dann aber bald emol de Start vo dere noie Firma bremsed. Kei Degustatione, kei grossi Fäscht, wo für de Absatz vom Wy wichtig währed. Inere usserordentlich GV vor guet eme Johr isch dann e Kapitalerhöchig bschlosse worde, wo dann i dem Johr hetz chönne umgsetzt werde.
Bi de gestrige GV, wo in de Aula vom Margi-Schuelhuus stattgfunde het, sind d Aktionär über de Gschäftsgang informiert worde. Wenig erfreulich isch d Ernti vo dem Johr gsi. Nachdem es im 2020 öppe 30 Tonne Trube geh het, het de fücht Summer au no de Mehltau gfördered. Zum Schluss sind es 7’734 kg gsi, also numme 25 % vom Vorjahresetrag, wo us em Rebberg zum Trotte uf Würelinge broch worde si. We me bedenkd, dass d Rebbuure öppe 4000 Stunde Arbet investiert hend, dass bliebed ned ganz zwäi Kilo pro Stund. Au in de Büecher gsehts no ned eso guet us. Di erscht Rechnigsperiode, wo sich über zwöi Johr erstreckt het, het en Ufwandsüberschuss vo 182’369.26 Franke brochd.
Aber es git natürli au gueti Nochrichte vo de WyStärn AG. Di neue Produkt «Ferdinand» und «Pink Moon» sind uf em Märt erfolgriich, «Pink Moon» isch sogar scho usverchaufd. Zudem gits scho e grossi Aazahl Läde und Restaurant, wo WyStärn-Wy im Aagebot hend. Zudem isch mit em «Leukothea» ab morn au de Barrique uf em Märt, so dass d Produktpalette vollständig isch.
Im Aaschluss an d Versammlig hend d Aktionär ihri «Dividende» in Form vomene (oder mehrere) Gläsli Wy übecho und es isch ned lang gange, da isch de Rotwy leer gsi und di durstige Gäscht sind uf de Rosé-Wy umgstige. Nebem Wy hets au Wurst vo de Metzgerei Felder geh und Brötli, wo de Beck Spitzbueb gstiftet gha het.