Am 4. November 2021 het im Tägi e Podiumsdiskussion zu de Wahl vom Gmeindamme selle stattfinde. Wegem Rückzug vom Andrea Bova, wo us gsundheitliche Gründ erfolgd isch, het de HGV s Podium abgsaid.
De Handels- und Gwerbverband Wettige (HGV) het für de nächscht Donnschtig e Podiumsdiskussion mit de beide Kandidate für s Amt vom Gmeindamme organisierd gha. De Roland Kuster und de Andrea Bova hend dodebi öppe 45 Minute vom Maurice Velati selle befrogd werde und aaschlüssend hetti au s Publikum chönne Froge stelle. Mit de schwere Erkrankig vom Andrea Bova, wo au zu sim Rücktritt als Gmeindrot füehrt, wird d Veraastaltig hinfällig.
D Ammewahl am 28. November 2021 wird gliichwohl stattfinde und di beide Kandidate werded Roland Kuster und Andrea Bova heisse. De Grund defür isch, dass de Roland Kuster no ne im Amt bestätiged isch, also no gwählt muess werde und zudem de Rückzug vomene Kandidat nach em Aameldeschluss us rechtliche Gründ ned möglich isch. Nach de Iireichig und de Gnehmigung vom Rücktritt vom Andrea Bova als Gmeindrat wird im 2022 dann au no en Ersatzwahl nötig.