![Chloster Wettige_0744](https://wettiger-nochrichte.ch/wp-content/uploads/2018/03/DJI_0744-678x381.jpg)
D Regierig vom Kanton Aargau wot für 17’930’000 Franke de Westflügel noi baue. S Chloschter würd dodemit em Idealtyp vo Zisterzienserchlöschter wider besser entspreche.
Uf de Grüenflächi nebe de Chloschterchile het früehner s Hönggerhuus gstande. Hüt isch d Muur vom Chrüzgang und d Turnhalle us de 1950er-Johr d Abgränzig vo de Chloschtergebäud nach Weschte. Das sell ned so bliibe. Zum de Kantonsschuel gnueg Unterrichtsrüüm z geh und au Platz für d Integration vom Chloschter Wettige ins Museum Aargau z ha, het de Regierigsrot bim Grosse Rot en Kreditaatrag über 17’930’000 Franke gstellt. Di alt Turnhalle sell rückbaud werde und es git en noie Weschtflügel, wo 11 Unterrichtsrüüm, e Lernhalle und e Galerie Platz finded. Uf de historisch Kontext wird selbstverständlich Rücksicht gnoh.