Sit em 6. September 2021 chönd Velo im Aargau bi usgwählte Chrüzige au rächts abbiege, wenns Liechtsignal rot isch. Z Wettige gits au e settigi Chrüzig.
S Schild falld gar ned gross uf, aber es het e wichtigi Bedütig. S gäli Velo uf schwarzem Grund mit eme Pfil nach rächts zeiged, dass me mit em Velo au dann dörf rächts abbiege, wenn s Liechtsignal uf rot isch. Obacht geh muess me natürli gliichwohl. S roti Liechtsignal het nämli für Velos, E-Bikes, E-Trottis und Mofas d Bedütig «kein Vortritt», me muess also warte, bis di Verchersteilnehmer, wo grünen hend, vorbi sind. Di noii Regelig het aber de Vorteil, dass me danach nüm muss warte, bis es grünen wird.