Meh wi 13 Johr het d Pfarreri Kornelia Baumberger-Dängeli in de reformierte Chilegmeind gschaffed. Hüt isch si in de wohlverdiend Ruhestand verabschieded worde.
Es isch im Jänner 2008 gsi, wo d Kornelia Baumberger-Dängeli ihri Stell in de Chilegmeind Wettige-Noiehof aaträte het D Wahl isch dann im Herbscht gsi und d Amtsiisetzig im Dezember 2008 zämme mit em Bruefskollege Lutz Fischer-Lamprecht, wo im April 2008 sini Stell aaträte het. Bim hütige Abschied vo de Kornelia Baumberger-Dängeli isch d Amtsiisetzig e paar mal Thema gsi, isch doch hüt mit em Abschied s Gägeteil passiert und si isch us de Pflicht als Pfarreri vo de Chilegmeind entlah worde.
Im guet bsuechte Gottesdienscht und em aaschlüssende Apéro isch d Wertschätztig für di engagiert Pfarreri spürbar gsi. Für de Gmeindrot Wettige het de Vizeamme Markus Maibach ihre alles Gueti gewünscht und de Noiehofer Gmeindrot und ehemolige Chilepfläger, de Fred Hofer het sich de Wünsch aagschlosse. Au de Pafrreileiter vo de römisch-katholische Pfarreie isch do gsi und d Chilepflägpräsidenti Margrit Wahrstätter und di ordiniert Kolleginne und Kollege hend zum Usdruck brochd, wi sehr si d Arbet vo de früschpensionierte Pfarreri gschätzt hend.
D Nochfolg isch no ned bestimmt und s Finde vomene adäquate Ersatz sig ned eifach, so d Chilepflägpräsidenti Margrit Wahrstätter.