Pfarreizentrum fiirlich eröffned

D Sanierig vom Forum St. Anton isch so guet wie abgschlosse. Mit ere Mess und eme aaschlüssendem Fäscht isch das gfiired worde.

D Froid über das inne vollständig sanierti Pfarreiheim isch guet z spüre gsi, im Gottesdienscht und bim aaschlüssende Fäscht. D Pfarrei het nach vile Mönet ohni richtigs Dihei wider Rüüm, wo s Pfarreiläbe cha stattfinde. Dass Begegnige wichtig sind, isch immer wider es Thema gsi, geschter, 14. August 2021, bim Fäschte.

Corona isch no allgegenwärtig gsi. In de Chile isch allewyl no jedi zwöiti Sitzreihe abgsperrt und s Fäscht het Dank em Wetter dusse chönne stattfinde und es isch spürbar gsi, wi de Wunsch nach analoge Träffe bi de Lüt vorhanden isch. Uf de Pubkt brochd hets de Gmeindamme Roland Kuster, wo vo sine Chind- und Jugenderinnerige im St. Anton verzäält het. De erscht Kuss mit eme Schuelschatz sig im Pfarreiheim gsi. Im Internet siged solchi Begegnige ned mögli. Er het allne gewünscht, dass es im noie Schmuckstück vo de Pfarrei sich analog chönnd begegne und es au de ei oder andere Kuss zwüsche zwöi Schuelschätz chönnd geh.

De symbolisch Schlüssel us Zopfteig, wo alli chend chönne es Stück devo ässe, isch vom Pfarreileiter Markus Heil und em Präsident vo de Baukommission, em Marcel Aebi, gärn entgege gnoh worde.