Sit aafangs Johr werded z Wettige vom 1 bis um 4i z Nacht d Kandelaber abgschalte. Im Iiwohnerrat sind drü Vorstöss traktandiert, wo die Ziite wänd verändere.
Witter chönnd die Meinige zum Lösche vo de Strassebelüchtig fast ned usenandgah, wie d Vorstöss, wo vom Iiwohnerrat am Donnschtig, 15. Oktober 2020 im Tägi behandled werde. De Thomas Benz (CVP), de Martin Fricker und de Daniel Notter (beidi SVP), de Adrian Knaup (SP) und de Leo Scherer (WettiGrüen) beurteiled s bisherig Liechterlösche positiv und wend, au wege positive Reaktione us de Bevölkerig, die Ziit ohni Strassdbelüchtig um e Stund bis um 5i verlängere. En witere Vorstoss zum Thema het d Simona Nicodet (CVP) iigreicht. Sie wot per Motion s Ziitfaischter vo de Abschaltung um e Stund vo 2 bis um 5 verschiebe und am Wochenänd uf d Abschaltung verzichte. De dritt Vorstoss zum Thema, es Postulat, het d Fraktion SVP iigreicht. D Fraktion wot, dass Abschaltig vo de Strassebelüchtig überprüefd wird und ggf. de Entscheid zur Abschaltig rückgängig gmachd wird.
De Gmeindrat wot die beide zletscht gnannte Vorstöss entgegeneh während er d Motion zur Verlängerig vo de Abschaltig ablehnt. Im Gegesatz zum Iidruck, wo d Motionär hend, heigs veel Beschwerde geh, schriibd de Gmeindrat, au Beschimpfige gege «unfähigi Politiker». S Sicherheitsbedürfnis vo de Bevölkerig sig höcher z Werte wie d Iisparige.