Ab em Sonntig, 23. August 2020 dörf für d Grossratswahle plakatiert werde. Vo de Wettiger Grossröt send zwöi d Spitzekandidate im Bezirk.
Als gröschti Gmeind im Bezirk Bade hed Wettige traditionell e starchi Verträtig im Grosse Rot vom Kanton Aargau. I de letschte Legislatur send meischt 7 Verträterinne und Verträter im Kantonsparlament gsi.
D Antoinette Eckert (FDP), wo als einzigi ned weder zur Wahl aatritt, esch set em 2009 Grossrötin. Sit em 2015 esch d Lea Schmidmeister (SP) Grossrötin und sit em Beginn vo de laufende Legislatur, im 2017 d Michaela Huser (SVP). Di andere vier amtierende Grossröt send alli im 2019 nochegrotscht und hend zum Teil Grossröt ersetzt, wo ebenfalls us Wettige gsi send. Im Januar esch das de Gmeindamme Roland Kuster (CVP) gsi, im Mai de Iiwohnerrat Daniel Notter (SVP) für de Wettiger Daniel Frautschi, im August de Iiwohnerrat Alain Burger (SP) und im November de Vizepräsident vom Iiwohnerrot, de Lutz Fischer-Lamprecht (EVP) für d Wettigeri Lilian Studer.
Uf em 1. Listeplatz vo ihre Partei im Bezirk Bade stönd d Michaela Huser und de Lutz Fischer-Lamprecht.