Sit hüt, Tischtig, 28. Juli 2020 um Vieri am Namittag gilt im ganze Kanton Aargau d Gfahrestuefe 4 für Waldbränd. S Füüre im und am Wald isch dodemit verbote!
Erst vor e paar Täg het de Kanton d Waldbrandgfahr vo Stuefe 1 uf 2 erhöht. Jetzt gits grad en Gump uf Stuefe 4. Trotz de Gwitter hüt sind d Böde uströchned. Dem het de Kanton Rächnig traid und d Waldbrandgfahr hüt uf Gfahrestuef 4 gsetzt. Das heisst, dass s Füüre im Wald und mit Abstand vo 50 Meter vom Waldrand verbote isch. Das Verbot gilt au für fäscht inschtalierti Füürstelle, Picknickplätz und Waldhütte.
Au usserhalb vo de Wälder sind folgendi Massnamhe strikt iizhalte, schriibd de Kanton:
- Brönnendi Raucherware (Zigis und so) und Zündhölzli dörfed ned uf de Bode grührt werde.
- Bi starkem Wind sell me wegem Funkeflug ned im Freien füüre.
- Füür immer beufsichtige.
- E Füürstell erscht verloh, wenn s Füür sicher glöscht isch.
Für de 1. August mit sim traditionelle Füürwerch gilt en Abstand vo 200 Meter vom Wald und de Waldränder. Au di uf de Produkt vermerkte Sicherheitsabständ zu brennbare Objekten (wie trocheni Fälder, Wald, Hüser) sind strikt iizhalte, schriibd de Kanton.