Uf de Spure vo de Kunscht im öffentliche Ruum

D Marie Louise Reinert, Iiwohnerröti vo de EVP het für d EVP Wettingen-Limmattal und alli Intresssiirti en Spaziirgang durch Wettige organisiird. Au 5 Kandidiirendi für de Nationalrot sind derbi gsi.
«Wo isch d Piazza della Fontana?», frogd d Marie Louise Reinert in de Mediemitteilig. We me us em EW-Ladegschäft uselaufd uf de linke Siite und find dete alles, wo zunere Piazza ghörd: Brunne, Monument, Bäum, Blueme, Bänkli und Us-Sichte. De Platz isch wider so instand geschtelld, wi en de Anton Egloff im 1963 geschtalted het. S Werk vom damals 30-jährige Künschtler red hüt no genau so subtil und vilfältig zum ufmerksame Betrachter, aber de Vercher isch luter.
Zwüsche dem Platz und em Schlusspunkt vom Spaziirgang in de Kapelle St. Anton hend sich di 20 Spaziirgänger uf de Wäg gmachd. Zwölf Wegmarkene, wo en Halt und e Betrachtig wert gsi sind, hend si aaglueged. D Schmitte vom Cesco Peter isch am Weg gläge, d Kulturmeile im Dorf, di Wand- und Brunnebilder im Dorfschulgländ. Do stönd und sitzed und liged Schönheite. Ein Höhepunkt isch de Chloschterkreisel, von de Lange Bank us z gseh. S Vorarbeiterhuus vom Andy Wildi flügd himmelwärts. Zum Träume eigned sich de Iigangsbereich zum Altenburgschuelhuus.
Hend ihr gwüsst, dass z Wettige au Stärn am Boden liged, in de Chinder-Gärte Wäscheklammere, und dass me vom Tägi us s Jurameer cha gseh, us dem d Lägere us Sediment ufstigd? Alles z gseh am Spaziirgang durch Wettige am letzte Samstg, 11. Mai 2019.
Di zwänzg Teilnehmer hend sich im Café Forum bi de Frau Flückiger voreme Zvieriteller nidergla. De Alex Schaufelbühl het vo de Rabe verzällt, was sehr schpannend gsi isch.
Di Kunscht ligd a de Strosse: alles gratis. Si ermögliched Iiblick, Durchblick, Rückblick, Usblick, Accelerando und ritardando. Vili Gschichte: es Plus, wo Wettige interessanter macht.
MLR und Red.