We am 10. Februar 2019 d Stimm- und Wahlzettel uszählt werde, dann gohts ned um e Wettiger Abstimmig, aber betreffe werded ois d Entscheid gliichwohl. Für di normal Briefwahl isch es aber z spot.
Am Sunntig gohts uf nationaler Ebeni um d Zersidligsinitiative, wo di Junge Grüene im 2016 iigreicht hend. Uf Wettige het d Initiative e direkti Uswirkig, isch doch nach em kantonale Richtplan Wettige Oscht als nois Baugebiet vorgseh. Bi de Aanahm vo de Initiative wär di Iizonig nüm mögli, will d Bauzone bim aktuelle Stand würde iigfrore werde.
Bi de einzige Wahl vom Sunntig gohts um d Ersatz vomene Grichtspräsident/ere Grichtspräsidenti am Bezirksgricht Bade für de Rescht vo de Amtsperiode. US Wettige sind kei Kandidate derbi, aber di Perosn wo gwählt wird, urteilt natürli dann au über Wettigerinne und Wettiger bzw. dene ihri Grichtsfäll.
Zur Wahl stönd
de Christian Bolleter (EVP), gebore 1977, wo z Enntebade läbt,
de Christian Fischbacher (SP), gebore 1979, wo z Bade wohnt und
d Nadine Hagenstein* (glp), gebore 1982, wo z Bärgdietike diheime isch.
Au wenn e normali Briefwahl nümm mögli isch, will d Wahl-Brief per B-Poscht verschickt werded, cha me d Briefwahlcouvert immer no im Rothuus abgeh oder dete i de Briefchaschte lege oder a de Urne abschtimme. D Urne isch am Sunntig, 10. Februar 2019 vom Nüni bis um Zähni am Morge offe.
* Mir hend über Google kei Website vo de Nadine Hagenstein gfunde, deshalb fehlt obe de Link.