Hüt chunnds zum «Showdown» im Iiwohnerrot

D SVP said, de Iiwohnerrot hetti zurzit keis Vertraue in de Gmeindrot, d Meinige zum Jubiläumsfäscht gönd wit usenand, d Choschteerhöchig vom Tägi werded es Thema si, … D Iiwohnerrotssitzig dörfd interessant werde.
Scho über d Budgetsitzig im Oktober und d Dezembersitzig im 2018 hend mir gschribe, si sig denkwürdig gsi. Es isch sicher ned falsch, we mir ähnliches vo de Sitzig erwarte, wo hüt, Donnschtig, 24. Jänner 2019 ab de Sibni am Abe im Rothussaal wird stattfinde.
Zum eine stoht de Entscheid über d Art und Wiis aa, wi 975 Johr Wettige selle gfiired werde. De Gmeindrot beatrait em Iiwohnerrot en Kredit in Höchi vo 450’000 Franke. Das der vom Iiwohnerrot aagnoh wird, isch so guet wi usgschlosse. Ufgrund vo de Fraktionsbricht isch z erwarte, dass 300’000 Franke gnehmiged werde. Au das isch vil Gäld, aber alli 25 Johr es grosses Fäscht – das sett au z Wettige möglich si. En Umfrog, wo mir uf Facebook gschtarted hend, zeiged jedefalls de Wunsch nach em settige Fäscht. 80% vo de Stimmende finded, me set die 975 Johr zum Aalass neh für es grosses Fäscht. Wi de Iiwohnerrot sich wird positioniire cha me hüt am Abe vo de Tribüne im Rothussaal us verfolge.

Im Ruum stoht dann au d Frog vom Vertraue zwüsche Iiwohnerrot und Finanzkommission (Fiko) uf de eine Site und em Gmeindrot uf de andere. Di letschte Beide Sätz im Fraktionsbricht vo de SVP hend im Vorfäld vil Staub ufgwirbled. Cha ei Fraktion für de ganzi Rot so e Behauptig in de Ruum stelle?
Hintergund vo de Ussag isch u.a. d Choschtesteigerig bi de Saniirig vom Tägi. In Form vonere Interpellation isch si hüt am Abe ebefalls traktandiird.

Zudem gibt es Widerstand vo Site FDP gege en Vorstoss zu «Me Natur z Wettige», wo de Gmeindrot wot entgegeneh.
Für Spannig isch also gsorged, wenn de Iiwohnerrotspräsident Hansjörg Huser hüt am Abe d Sitzig eröffned!