Wer regelmässig d Fraktionsbricht vor de Iiwohnerrotssitzige dued läse, dem isch de Satz sicher ufgfalle: «S Vertraue vo Iiwohnerrot und Finanzkommission hat er (gmeint isch de Gmeindrot) zurzit jedefalls nöd.» heissts da im Brichd vo de SVP. Mir hend bi de Präsidie vo de Fraktione und de Finanzkommission nochegfröged.
D SVP, so oise Iidruck nach de Rückmeldige vo de Fraktionspräsidie, stoht mit ihrem Vorwurf, de Iiwohnerrot und d Finanzkommission hetted zurzit keis Vertraue in de Gmeindrot, fascht eleige do. Begründet het d Fraktion ihri Iischätzig mit verschidnige Abstimige und Vote im Iiwohnerrot, aber au mit de Abgäng vo zwöi Abteiligsleiter in de Gmeindverwaltig.
Hiir d Reaktione vo de andere Fraktionspräsidie:
De Christian Wassmer, noie Fraktionspräsident vo de CVP het ois gschribe, dass es in einige Pünkt verschidnigi Uffassige zwüsche de Fraktion und em Gmeindrot würd geh, aber me sig im Gschpröch mitenand und chönnd sich mit em Gmeindrot über di unterschidliche Meinige konschtruktiv ustuusche. Er nennd explizit s Träffe vom Gmeindrot mit der Fraktions- und Parteipräsidie i de letschte Woche und au de Iibezug vom Iiwohnerrot in de Planigsprozess, wo für vili usserhalb vo de Planigskommission intransparent sig gsi. Für ihn isch s Verhältnis zum Gmeindrot stimmig und vertrauensvoll.
Ähnlich tönts bi de FDP. D Fraktionspräsidenti Judith Gähler het sich de Ussag vom Christian Wassmer aagschlosse und betond, dass de Gmeindrot versuechi Aalige ufzneh und in passender Form z informiire. D Legisalutzil und de Ufgabe- und Finanzplan, so d Judith Gähler , siged es guets Bispil, wi sehr de Gmeindrot um en guete Ustusch mit em Iiwohnerrot bemüeht sig.
Au d Fraktionspräsidenti vo de Fraktion EVP/Forum 5430, d Marie Louise Reinert schätzt d Biträg vom Gmeindrot für e gueti Kommunikation und Information vo de Mitglider vom Iiwohnerrot. Si nennt, wi d Judith Gähler, explizit de Ufgabe- und Finanzplan sowi de Iiblick in d Legislaturzil, wo über d Richtig und de Ablauf vo künftige Planigsschritt Uskunft gebed. S Verhältnis zum Gmeindrot empfinded si als offe und konschtruktiv.
D Lea Schmidmeister vo de Fraktion SP/WettiGrüen meint, dass d Kommunikation zwüsche de Fraktion und de SP-Gmeindröt würdi funktioniire. Schwirig heig d Fraktion d Diskussion zur Tägisaniirig im 2018 gfunde, wo es wdersprüchlichi Uusage zum Stüürfues hetti geh. Das würdi natürli am Vertraue chratze.
Vo de Fraktionspräsidie stimmt numme d Ruth Jo. Scheier vo de GLP de SVP, zumindescht es Stück wit zue. Si verwiisd uf de Fraktionsbricht, wo stoht, dass d GLP-Fraktion e Verbesserig vo de Kommunikation vom Gmeindrot wünschi. Als Partei ohni Gmeindrot und ohni Mitgliid i de Fiko sig es schwirig, rechtzitig an relevanti Informatione z cho. Au stört si sich dra, dass – wi jetzt bi de Kreditvorlag für 975 Johr Wettige – de Aatrag erscht würd vorlige, we me en Aatrag eigentli nüm cha zrückwiise, ohni s ganzi Projäkt z bodige. E zuekunftsgrichteti und nachhaltigi politischi Arbet sig so schwirig.
Au de Präsident vo de Finanzkommission, de François Chapuis het sich güsered:
«D’FIKO het de Kreditaatrag 975-Johr Wettige iigehend prüeft ond behandlet. Debi het d’FIKO mehreri formali und finanzrächtlichi Punkt beastandet. Mit de Reduktion vom Gmeindsbiitrag nimmt d’FIKO aber en andere politische Standpunkt ii. Dem entsprechend unterbreitet sie em Iiwohnerrat ihri Aaträg.
Es esch sälbstverständlich, dass jedi Siite för ihri Sach iitritt und deför kämpft. Das esch’s übliche Vorgoh und Verständnis in eusere diräkte Demokratie ond entspricht em Gronduftrag von der FIKO. Drus abzleite, dass d’FIKO drum s’Vertraue i de Gmeindrat verlore hätti, goht us minere Sicht z’wiit und entbehrt jedere Grundlag. Insbsondere drum, well in der FIKO kein söttigi Diskussione gführt worde sind.
Im Gegeteil, dörf ich als Präsidänt vo der FIKO feststelle, dass d’ Zämearbet mit em Gmeindrot, dr Verwaltig und der FIKO sehr offe, transparent und konstruktiv verlauft.»
D SVP stoht also mit ihre Behauptig fascht elleige da. Numme vo de GLP chunnt öppis ähnlichs wi Unterstützig. Wieso d Fraktion in ihrem Bricht dann aber de ganz Rot für sich in Aaspruch nimmt und ned eifach schriibd, ihri Fraktion heig zur Zit keis Vertraue in de Gmeindrot? Mir wüssed es nöd …