D PostAuto Schwiiz AG het widerrechtlichi Subventione übecho, wo jetzt zruck zahld werde. Au Wettige übechunnd e Stange Gäld.
Vo de zvil zahlte Subventione i de Johr 2007 bis 2018 wird d Postauto Schwiiz AG insgsamt 188.1 Millione Franke zruck zahle, do druf hend sich de Bund, d Kantön und PostAuto Schwiiz geiniged. In de Aargau gönd insgsamt 14.9 Millione Franke, wo teilwiis bim Kanton bliibed, teilwiis an d Gmeinde uszahld werde. Als gröschti, nöd durch e Fusion entschtandeni, Gmeind im Kanton isch de Wettiger Aateil relativ höch. Numme Bade und Aarau übechömmed meh Gäld, wi en Ufstellig vom Kanton zeiged. Für Wettige sind es 310’488.45 Franke, wo zruck in d Gmeindkasse flüssed, meh wi es halbs Stüürprozent. Ob das Gäld für de Schuldeabbau bruuchd wird, wird sich zeige.