D Zivilschutzorganisation (ZSO) Wettige-Limmattal isch am San Bernardino im Iisatz. Zämme mit de ZSO Region Länzbrg unterstützed si d ZSO Brugg Region, wo sit Johre am San Bernardino aktiv isch.
Ineme grosse Konvoi sind di öppe 100 Lüt vo de drü Aargauer Zivilschutzorganisatione mit ihrem Material uf de San Bernardino gfahre, da drunter knapp über 40 us Wettige und em Limmattal. Es goht dete um d Instandstellig vo Wäg und Häng, de Beseitigung vo Winterschäde und de Instandstellig nach Brandschäde.
Gleitet wird de Iisatz vom Hptm David Henzmann vo de ZSO Brugg Region. Vo de ZSO Wettige-Limmattal isch de Pioniirzug 2 unter de Leitig vom Lt Tobias Ellenberger und sim Stv. Lt Mirco Toso im Iisatz. De Iisatz het geschter Sunntig, 19. Auguscht 2018 gschtartet und goht bis und mit am Fritig, 24. Auguscht 2018.
Mit derbi isch au de Maj Ronald Rickenbach, de Kommandant vo de ZSO Wettige-Limmattal. Er isch für d Adminischtration und d Chuchi verantwortlich. Mit ihm hend mir hüt am Morge chönne telefoniire und hend derbi erfahre, dass d Armee de Iisatz mit Helikopter unterstützt (s. Video). Zitlich sind d Armee-Iisätz iigschränkt, will d Helis au Wasser uf d Alpe müend flüge, aber für di drü ZSOs isch d Unterstützig durch d Armee sehr hilfriich: