Nach öppe drü Johr isch hut de Schuelhuusplatz z Bade eröffned worde. Gfäschted wird hüt, Samschtig, 18. Auguscht 2018 bis tüüf in d Nacht und s umschtrittene Kunschtwerk uf em Cordula-Platz het en Name übecho.
Nach drü lange Johr laufd de Vercher uf em Schuelhuusplatz wider normal. Grund gnueg, dass de Kanton, d Stadt Bade und d Region das gmeinsam fiired. Während de Ziitplan für di gross Baustell im Grosse und Ganze het iighalte werde könne, het das bim Fäscht nöd recht klapped. De Kanton het d Fäschtaasproche uf di 10.40 Uhr aakünd gha, d Stadt Bade uf 10.45 Uhr und wo mir um 10.40 Uhr bi de Cordulapassage aacho sind, sind d Aasproche im Prinzip scho vorbi gsi (vgl. s Video). So sind au einigi Zueschauer z spot cho und entsprächend enttüschd gsi.
Pro Velo het sich sehr positiv zu de Passage unter em Schuelhuusplatz güssered und d Schpanisch Brötlizunft isch miteme «Bus» durch d Cordula-Passage gfahre. Danach het de Brödlimeischter s umstrittene Kunschtwerch uf em Cordula-Platz, wo us 520 Gummimatte bestoht, uf de Name «Gummi Nitruus» taufd. Bi schönem Summerwetter und gueter Stimmig hend dann alli uf das glungeni Bauwerch chönne aastosse, da drunter au fascht de komplett Gmeindrot vo Wettige.
S Fäscht goht hüt no de ganz Tag und en Wehrmuetstropfe isch allefalls, dass s Füürwerk muess usfalle.
Hiir oises Video:
Und wenn öppe d Aasproch vom Regiirigsrot Stephan Attiger nöd wot verpasse, cha er hiir luege: