Uf em Bahnhofareal selled bis zu 1000 Lüt chönne wohne

Scho sit em 2010 laufed Gschpöch zwüsche de Gmeind Wettige und de verschidnige Grundeigetümer vom Bahnhofareal. Jetzt goht öppis vorwärts.
Über s Bahnhofareal hend mir scho einisch im Auguscht 2016 brichted, wo mir mit em damalige Gmeindamme und em hütige Regiirigsrot Markus Dieth es Interview gführt hend. Sither het me wenig über d Fortschritt vo dem Projäkt vernoh, bis hüt. Bi ere Mediekonferenz am 13. Auguscht 2018 het d Gmeind nämli über de Gsatltigsplan, d Teiländerig vom Bauzoneplan und über s Mitwirkigsverfahre nach §3 vom Baugsetz informiirt.
Uf em betroffene Areal, wo e Flächi vo 35’000 qm umfassd, selled für Wohne und Arbeite Gschossflächene vo gsamthaft 50’000 qm entstoh. Vo dene müend mindscht 20% für en Arbeitsnutzig vorgseh si, also für Dienschtleischtige, Retail, Gaschtronomie und Chligwerb. De Wohnruum, wo entstoht, wird für öppe 800-1000 Iiwohner lange. Zudem sind 500 zusätzlichi Stellplätz für Bike + Rail planed und en noie Standort für Chindsgi/Chinderhort.

Sowohl zu de Änderig vo de Nutzigsplanig wi zum Gstaltigsplan chönnd alli Interessiirte Stellig neh, gliich wo si wohned oder wi fescht si vo de Veränderige betroffe sind. D Gmeind veraastaltet dazu en Infoveraastaltig und zwar am Tsischtig, 21. Auguscht 2018 um Sibni am Abig i de Aula vom Schuelhuus Margeläcker.

Details sind ab em 22. August 2018 au unter folgendem Link uf de Homepage vo de Gmeind ufgschalte: http://www.wettingen.ch/entwicklungsplanung. Glichziitig faht s Mitwirkigsverfahre mit de Uflagefrischt ah. Bis zum Donnschtig, 20. September 2018 cha me per Mail (entwicklungsplanung(at)wettingen.ch) oder Poscht (Gemeinderat Wettingen, Teiländerung NP/GP, Alberich Zwyssig-Strasse 76, 5430 Wettingen) Aaträg (mit Begründig!) stelle.