Sit meh wie 36 Johr isch de Stefan Burkhard Pfarrer bi de reformierte Chilegmeind Wettige-Noiehof. Hüt isch er verabschieded worde.
Trotz Schuelferie isch d reformiert Chile am Sunntig, 26. Juli 2026 guet gefüllt gsi und jede het gmerkt: hüt isch öppis speziells. Es isch de Abschied vom Pfarrer Stefan Burkhard gsi, wo meh wie 36 Johr in de Chilegmeind gschaffd het. In der lange Ziit isch er vile Mönsche begegnet und het viele in bsundere Läbesphase begleitet. Wie d Präsidenti vo de Chilepfläg, d Margrit Wahrstätter bim aaschlüssende Apéro verzällt het, het er meh wie 400 Jugendlichi konfirmiert und bi meh wie 500 Abdankige d Truurfamilie chönne begleite.
Im Gottesdienscht het ihn de Vizedekan Markus Dettwiler vo sine Pflichte entbunde und bim Apéro het nebe de Margrit Wahrstätter au de Wettiger Gmeindamme Markus Haas, wo extra für en Tag d Ferie unterbroche het, Gruesswort vo de Gmeind überbrochd und vo persönliche Begegnige mit em scheidende Pfarrer verzällt. Au de Organist Jonas Hablützel, d Pfarrerin Renate Bolliger, de Pfarrer Lutz Fischer hend Erinnerige Teile und gueti Wünsch mitgeh. Im Name vo allne Aagstellte het d Cilgia Vögeli em Stefan Burkhard es Foti vom Pfarrhuus a de Erlenstrass und es witers Gschänk überreichd. D Wertschätzig vo sinere Arbet aber au für d Untersützig durch sini Frau Margrit isch spürbar gsi.
Au mir vo de Wettiger Nochrichte wünsched em Stefan Burkhard und sinere Familie für d Zuekunft alles Gueti und Gottes Säge.