Es isch en lange Kampf mit Höchene und Tüfene gsi, für Gegner und Befürworter. Jetzt isch klar, dass de Therapiehof «Begegnung mit Tieren» nüm witergfüehrt wird.
De Schock bi de Befürworter vom Therapiehof, wo d Familie Sozzi in de letschte Johrzehnt am Lägerehang ufbaud het, isch gross gsi, wo s Verwaltigsgricht d Spezialzone «Berg» für rechtswidrig erklärt het. D Gegner hend dodefür Froid gha und sich in ihrem Engagement für s Lägereschutzdekret bestätiged gseh.
D Entflechtig vom Buurehof und de vo Sozzis gründete Stiftig «Begegnung mit Tieren» isch nach em Grichtsurteil ned mögli, zumindest ned uf de Parzelle vo Sozzis, wo de Stiftig das Land hend welle im Baurächt gratis abgeh. Nach 15 Johr intensiver Planig mit Gmeind und Kanton het d Stifitg bschlosse, dass si ned wird witerkämpfe, wie s Regionaljournal Aargau/Soledurn geschter gmelded het. De Therapiehof wird ned per sofort gschlosse, aber lang werded di Kliente nüm chönne in de Kontakt mit Ross, Esel, Hüehner, Meersäuli und was es an Tier dete het, cho.