Z Ännetwettige send im 2025 einigi bekannti Restaurant zue gange. S Bones, s Paradies und au d Spedition. Aber s git au nois.
D Schliessige in Ännetwettige spiegled en allgemeine Trend und d Useforderig i de Schwiizer Gastronomie weder, die med Personalmangel an Fachchräft, wie im Paradies, stiegendi Chöschte wie Mietene, Stromchoste, höheri Mindestlöhn und sinkendi Umsätz. Di Faktore schaffed es schwiirigs Umfled.
Site m 4. November esch die legendäri «Spedition» unter eme neue Name «SpeditionX» und mit eme ganz neue, coole Konzept weder offe!
Hinder dem spannende Projekt stönd vier starchi, jungi und kreativi Persone: De Alessandro «Ale» Mordasini, ehemals Chuchichef «Krone Regensberg», «Goldener Koch 2019», d’Antonina Businger, Festgstalteri vo de Badefahrt 2023, d Jasmin Suana und d Kim Landös, beidi vo de benachbarte Rampe. De Elan esch garantiert debii – die vier gönd uf Vollgas!
S Konzept esch intressant und ganz und gar nöd 08/15: D’SpeditionX wott dreimal pro Jahr s kulinarische Thema wächsle. Und das isch meh als nume ä neui Charte, das isch en Event! Es söll e Gschecht verzellt werde, wo mit em Ambiente, de Atmosphäre und natürlich mit em Esse es einzigartigs Gastro-Erläbnis schaffe söll.
D Antonina meint dezue: «En Ort, a dem mer ned nume guet isst, sondern für es paar Stund ine anderi Welt itaucht.»
De Start macht öppis für all Frankriich-Fans, wo gärn Chäs und rote Wii hend: S’erscht Thema heisst «Chez Jean-Pierre – Bouchon Lyonnais depuis 1980».
Es esch ä französischi Bistrochuchi, wo vo de 80er-Jahr z’Lyon inspiriert esch. Mir chönd eus scho uf bodeständiges, feins und lässigs «Bouchon»-Flair i dä SpeditionX freue. Französischi Chuchi, wo nöd z’schick esch, aber enorm guet. Was s nöchste Thema werd sii, ged’s s Team no ned bekannt, aber a Idee fehlts ned…!
Meh Info’s bechömmed Ihr uf de Huus-Sitte vo de SpeditionX: http://www.speditionx.ch