Scho voreme Johr het ois de Stefan Kalt vom RVBW informiert, dass s Busdepot a d Autobahn bim Segelhof wot zügle. Jetzt isch de Landchauf in trochene Tüecher.
Scho sit Jahre isch de RVBW am Überlege, wo es nois Busdepot chönnd baud werde. S aktuelli Depot z Wettige isch z chli, d Stromleitige sind z schwach für de beabsichtigt Umbau vo de Busflotte und d Lag a de Halbarte-/Landstrass wär für Wohnruum ideal. Us dene Gründ het de RVBW sich uf d Suechi nach Alternative gmachd und isch z Dättwil-Segelhof fündig worde, do wo es Parkhuus vo de ABB stoht. En Aafrog bi de ABB het damals ergeh, dass de Wältkonzern grundsätzlivh parat wär, das Grundstück z verchaufe, aber das per Bieterverfahre müesst mache. So isch es e chli gange, bis de RVBW het chönne sicher si, dass er das Grundstück cha überneh.
Bi de GV vo dere Woche het de Stefan Kalt, Gschäftsführer vom RVBW, chönne mitteile, dass es per Ende Juni 2024 sowit set si. Planed isch, dass de RVBW selber Strom produziert, mit dem me nachts d Büs cha lade und am Tag d ABB, wo au en höche Strombedarf het, chönnd beliefere. Dodezue isch au en moderne Stromspicher mit 5 Megawattstunde Kapazität vorgseh. Au Parkplätz für d ABB wird de RVBW zur Verfüegig stelle, werded die doch v.a. unter Tag bruuchd, wenn d Büs unterwägs sind. Ob di notwendig Garage unterirdisch wird si, isch no offe. Klar isch aber, dass es Gebäud a dere Stell numme 13.5 Meter höch dörf si, zum bauzonekonform bliibe.