Im Juni 2017 esch en Projektierigskredit zur Erarbeitig vom Hochwasserschutz bewilliged worde. Sit dem esch in enger Zämearbeit mit Bund und Kanton s Wasserbauprojekt zum Usbau vo de Hochwassersicherig und de Revitalisierung vom Dorfbach/Gottesgrabe erstellt worde.
Für de Hochwasserschutz send mehreri Variante prüeft worde, bis sich di Variante, wo jetzt planed werd, duregsetzt hed. S Aktuelle Projekt hed drü Hauptabschnitt.
1: Trennbauwerk; Hochwasserschutz im „Doppelstöcker“; Revitalisierung vom Dorfbach
2: Hochwasserentlastigskanal via Alberich Zwyssigstross in d Limmig
3: Sidligsufwertig und Revitalisierig vom Dorfbach ab Lindeplatz
D Choste für de Hochwasserschutz und di wasserbauliche Revitalisierig vom Dorfbach/Gottesgrabe vom Friedhof Brunnewiese bis Alteburgstross und d Sanierig vo Kanalisation, Beläg und vo Restflächene und d Erneuerig vo de öffentliche Belüchtig sölled gmäss Kostevoranschlag 27’640’000 SFr koste. De Bund, Kanton, d ewz, naturemade star-Fonds und d AGV beteiliged sech med 17’695’560 SFr a dene Arbeite. Somit chömed 9’944’440 SFr als Choste uf Gmeind Wettige zue.
Am Mändig, 13. Mai am Obig heds e Infoveranstaltig gäh im Tägi, wo de Kanton und d Gmeind sowie Fachlüt übers Projekt informiert händ und au für Froge zur Verfüegig gstande send. Ca. 100 interessierti Persone, vor allem us de direkt betroffene Nachbarschaft (Dorfstross, Bächliweg und Gottesgrabe) send vor Ort gsi. Dementsprechend esch es be de Froge de au drum gange, warum und wieseo mer so veel Geld muess usgä. Z.B. wieso mues mer am Bächliweg de Bach ah-hebe und warum cha mer das ned eifach so sie lo wie’s bis jetzt funktioniert hed… Es heds au positivi Biträg gä zo dene plante Umbaute, z.B. passiert so au was aktiv für d Biodiverstität rund um Bäch. Secher esch au s Thema gsi, rund um Dorfstrosse, dass di denn schmäler werd und s Unfallrisiko grösser, vor allem für Fuessgänger und Chend! Au eini vo de Froge, wo gstellt worde esch, was passiert wenn d Bevölkerig a de Urne NEI stimmt! D Antwort uf das esch, würd das Projekt im Nachhinein realisiert werde müsse, das ganze de veel meh werd Choste für Wettige, für d Stürzahler, well die Beteiligunge vom Kanton gstriche werdet!