Truurglüt zum Jahrestag!

Am Fritig, 24. Februar 2023 isch es genau eis Johr her, dass Russland d Ukraine aagriffe het. Zum Zeiche vo de Truur werded am Jahrestag vom Föifvornüni bis um Nüni am Morge d Glocke lüte.
De Aagriffschrieg vo Russland uf d Ukraine het scho zehtuusige vo Mönsche s Läbe choscht und Millione sind uf de Flucht. Vilil sind innerhalb vo de Ukraine gflüchtet, vili in d Nachbarländer, aber au in de Schwiiz het es vili ukrainische Flüchtling. Aber de Chrieg goht witer, wil Russalnd schints immer no demit rechnet, wenigstens en Teil vo de Chriegsziel z erreiche.
Als Zeiche vo de Truur über das Liide und Sterbe het de Schwiizerischi Städtebund d Chilene iiglade, am Jahrestag d Glocke z lüte und alli Mönsche, zum um Nüni am Morge e Schweigeminute iizhalte. Z Wettige beteiliged sich nach oiserne Informatione alli Chilene und Kapelle, wo Glocke hend.