De ältischt Planigsverband vo de Schwiiz isch 75 worde. In Würelinge isch de Schlussevent vom Jubiläumsjohr gfiired worde.
Im Mai 2022 isch de Planigsverband «BadenRegio» mit eme Startevent ins Jubiläumsjohr gstartet. In de 24 Mitgliedsgmeinde sind 121 Pünkt markiert worde, wo mit verschidnige Jubiläumsroute verbunde worde sind.
Bim Schlussevent vom Jubiläumsjohr, wo z Würelinge stattgfunde het, isch d Aazahl Gäscht übersichtlich gsi. Am Aafang het de Gmeindamme vo Würelinge, de Patrick Zimmermann d Gäscht begrüesst, d Grossratspräsidenti Elisabeth Burgener het d Festaasprach ghalte und danach het de Roland Kuster, Gmeindamme vo Wettige und Präsident vo Bade Regio, s Wort ergriffe und au de Gwünner vom Wettbewerb gratuliert, wo de Planigsverband für s Juibläumsjohr lanciert gha het. D Hauptgwinner hend im Aaschluss an de Aalass grad chönne ihre Priis entgegeneh, e Ballonfahrt in de Region, zu dere si mit Verträter vo BadeRegio in zwöi Ballön ufbroche sind.