Geschter, 17. August 2022 het im Tägi en usserordentlichi Ortsbürgermeindversammlig stattgfunde. Es isch um de Chauf vom Ferieheim z Ftan gange.
Dass d Iiwohnergmeind Wettige s Ferieheim z Ftan wird verchaufe, isch scho länger klar. De Verchauf isch im Iiwohnerrat zwar ned ganz unumstritte gsi, aber d Mehrheit het klar für en Verchauf gstimmt. Bi de Ortsbürgergmeind im Juni isch us dem Grund d Frog ufcho, ob ned d Ortsbürger sete das Huus chaufe. Au de entsprechend Aatrag isch gstellt worde. Wil de Verchauf aber ned traktandiert isch gsi und e Behandlig im Dezember, also bi de nächschte ordentliche Ortsbürgergmeindversammlig, z spot gsi wär, het am Mittwoch im Tägi e usserordentlichi Ortsbürgergmeindversammlig stattgfunde. 98 Ortsbürgerinne und Ortsbürger hend de Wäg ins Tägi gfunde, dodezue einige Gäscht und Medeiverträter. D Diskussion isch ned so usführlich gsi, wi manchi das vilicht erwartet hend. Nebe de Stellignahm vo de Finannzkommision vo de Ortsbürger und de Ortsbürgerkommission het es numm zwöi längere Vote und eis churze geh. Bi de Abstimmig hend dann 33 Stimmberechtigti für de Aachauf vom Ferieheim gstumme, 49 degege und es het ei Enthaltig geh. Dodemit isch de Chauf vom Ferieheim vom Tisch.