Scho sit längerem hets Gerücht geht, dass d SBB de Schalter am Bahnhof chönnd schlüsse. Im Oktober isch es so wit.
De Schalter am Bahnhof Wettige garantiert e Nöchi zu de Kunde und bi Buechige isch me bisher, au bi komplexere Aalige immer guet unterstützt worde. Dodemit sell im Oktober Schluss si. Wie s Bademer Tagblatt meldet, wird de Schalter im Bahnhof Wettige im Herbst gschlosse. Für die Bahnkunde, wo ned online chlönnd oder wend bueche, isch das e schlächti Nochricht. Sie müend in Zuekunft if Bade, wenn si an en bediente Schalter wend.
De Bahnhof, wo im 1876 eröffned worde isch, ghörd zwar ned zue de alleräteschte i de Schwiiz, wil s ursprünglich Trassee vo de Spanischbrötlibahn, wo im 1847 als erschti Isebahn vo de Schwiiz eröffned worde isch, über d Noiehofer Site uf Bade gführt het, aber mit bald 150 Johr het er doch es rächts Alter. Vo 1907 bis 1909 isch d Strecki uf Seebach zudem elektrifiziert gsi, so dass de Wettiger Bahnhof zu de erschte Bahnhöf ghört het, wo es en Oberleitig geh het.