Am Sunntig startet in de Galerie im Gluri Suter Huus d Usstellig «Ein Sammlungswesen» zum Jubiläum. Bis am 3. Juli 2022 cha me 50 Werk us de Wettiger Kunstsammlig goh aaluege. Zudem gits Bilder vom Cartoonkünstler Lawrence Grimm.
Im 1972 isch d Galerie im Gluri Suter Huus (GSH) mit ere Usstellig vo Werch vo de Ilse Weber eröffned worde. Sither het es meh wie 280 Usstellige mit aktueller Kunst geh. Eng verbunde mit de Usstellige im GSH isch d Kunstsammlig vo de Gmeind Wettige, für di immer wider Werch vo dene Usstellige zuekauft worde sind. Zu dere in de Zwüscheziit mehr wie 1’100 Werch vo regional und überregional bedütende Künstler ghöred au mehreri privati Schenkige und Legat. En Grossteil vo dene Kunstwerk sind im öffentliche Ruum und öffentliche Gebäud vo de Gmeind z gseh.
Für d Usstellig «Ein Sammlungswesen» hend fascht 50 Persone, wo de Galerie in irgendere Art verbunde sind, es Kustwerch us de Sammlig vo de Gmeind usgläse und en Wortbitrag dezue gschribe, was si mit dem Werch verbinded. Zuesätzlich isch de Cartoon-Künstler Lawrence Grimm iiglade worde, d Usstellig mit sine Werch z ergänze.
D Vernissage isch am Sunntig, 15. Mai 2022 um 11i. Infos zu de Usstellig und de Öffnigszite finded sich uf de Website vo de Galerie im Gluri Suter Huus.