D Baulücke bim Murihof cha endlich gschlosse werde

Sit em unbewilligte Teilabbruch vom Murihof im Oktober 2018 gits a de Dorfstrass 67/69 e unschöni Baulücke. Si cha jetzt gschlosse werde, wil de Gmeindrat d Baubewilligung erteilt het.
Uf em Areal vom Murihof hend in drü Gebäud zämme 21 Wohnige selle erstellt werde. Für di Überbauig mit em Umbau vom Murihof het d Gmeind am 23. Juni 2016 e Baubewilligung erteilt, schribd d Gmeind innere Mediemitteilig. Wo nach em Beginn vo de Bauarbeite de gschützti Murihof illegal und ohne Baubewilligung teilwiis abbroche worde isch, het d Gmeind en Baustopp verfüegt. D Noibaute dehinter sind vo de Baustopp ned betroffe gsi und sind in de Zwüscheziit fascht fertig, aber d Zuefahrt zu de Tüüfgarage vo de noie Wohnige isch dur de Murihof planed gsi und het bisher ned chönne erstellt werde.
Im noie Bauprojäkt, für das de Gmeindrat jetzt d Bewilligung erteilt het, wird de denkmalschützerisch wertvolli Keller und d Dachkonstruktion vom Murihof, wo ned zerstört worde sind, integriert.
Wegem illegale Abbruch het d Gmeind en Aazeig bi de Staatsaawaltschaft gege mehreri Persone iigreicht gha. De Fall isch in de Zwüscheziit abgschlosse und ei Person isch zuere Buess verurteilt worde.