Mit viel Spannig isch d BoxGala in de Trafohalle z Ännetwettige erwartet worde. Im föifte Kampf vom Abe het de Ando Hakob de Intercontinental-Gürtel vo de World Boxing Federation (WBF) im Weltergwicht gwonne.
Nachere Musikshow zur Iistimmig het bi dere Fight Night vom letschte Samschtig im Trafo z Ännetwettige de Michael Sokoll, wo dur s Programm gfüehrt het, di drü Initiante interviewt, wo de Aalass überhaupt erscht möglich gmachd hend: De Werner Eglin, de Reto Schaffner und de Martin Thalmann hend sich vom Boxer Ando Hakob la begeischtere und so isch d Idee vo de BoxGala entstande.
Mit drü Kämpf vor de Pause sind dann di beide lang ersehnte Top-Fights endlich losgange. De Klingnauer Schwergwichtsboxer Stefan Rumpold het in sim föifte Profikampf sin föifte Sieg chönne fiire. Scho in de erschte Rundi isch sin Gegner, de Dejan Veljkovic, einisch am Bode gsi. Danach het de Veljkovic versuecht, sich mit Klammere über Wasser z halte, so dass er letschtendlich disqualifiziert worde isch. De Stefan Rumpold het de Sieg aber uf jede Fall verdient gha.
Und dann isch de Ando Hakob cho, der, uf den an dem Abe alli gwartet hend. Im Kampf mit em Italiener Alessandro Fersula isch es im de Intercontinental-Gürtel vo der World Boxing Federation (WBF) im Weltergwicht gange. Die beide sind über di volli Distanz vo 10 Runde gange, es isch aber immer offesichtlich gsi, dass de Ando Hakob de Kampf im Griff het. So hend das nach em Kampf au alli drü Punktrichter gseh, so dass de Abe mit vil Emotione und vo Site vom Boxchampion au gegenüber sine Sponsore mit vil Dankbarkeit z End gange isch.