S OK vo de «Badefahrt» het s Motto vom Fäscht bekannt geh

Dass di nächscht «Badefahrt» im 2023 wird stattfinde, das isch scho länger bekannt. Sit hüt isch au bekannt, was s Fäschtmoto wird si.
Vom 18. bis zum 27. August 2023 wird di nächscht «Badefahrt» stattfinde. S Motto vom Fäscht z Ännetwettige wird «Neo-» si, wi s Badener Tagblatt mitteild. D Wettigeri Antonia Businger, wo noi für d Festgstaltig und di künstlerisch Leitig zueständig isch, het erlütered, was es mit em Motto uf sich het. Vergangeheit, Gegewart und Zuekunft vo de Badefahrt siged in dem Motto vereint. Es sell e Brugg schlage zwüsche Tradition und Gschicht und git de Verein grossi Freiheite.
Offe blibd, ob s Fäscht es Johr nach hinte oder vier Johr füre zoge worde isch. D Frog, obs eigentli e chlini oder e grossi «Badefahrt» isch, wird nämli ned beantwortet. De OK-Präsident Oliver Egli het gegenüber em Badener Tagblatt betont, dass dass d Frog vo gross oder chli vom Tisch sigi. Es gäb numme ei Badefahrt. Und dass si im 2023 stattfind, het dodemit z due, dass di erscht im 1923 stattgfunde het, s Fäscht im 2023 also es 100-Johr-Jubiläumsfäscht isch.