Scho de 25. Wächsel im Iiwohnerrat

Am Donnschtig, 1. Juli 2021 het de Iiwohnerrot sini letschti Sitzig vor de Sommerpause und di zwöitletscht vor de Wahle am 26. September. Mit em Daniel Brüllmann (FDP), wo für d Angela Eckert nocherückt, wird de 25. Wächsel in de laufende Legislature vollzoge.
D Iiwohnerratspartei sind alle am Vorbereite vo de Wahle am 26. September. Bevor de Iiwohnerrat noi gwählt wird, wend mir en Blick uf d Wächsel läge, wo es in de Legislatur 2018/2021 geh het. Es sind insgsamt 25 Iiwohnerrötinnen und Iiwohnerröt, wo im Lauf vo de letschte vier Johr noi (oder wider) in de Iiwohnerrot nochegrütscht sind und dodemit au 25, wo nüm debi sind. Drü devo sind sogar im Lauf vo de Legislatur nochegrütscht, aber gliichwohl nümm debi.
D Wächsel sind ned gliichmässig über d Parteie verteilt. Bi de gröschte Fraktion, De Mitti CVP Wettige hets sibe Rücktritt geh, wobi d Marija Hess in de Legislatur nochegrütscht und au wider us em Rat usgschide isch. Nach em Rücktritt vom Andi Benz isch bi de Sitzig vom letschte Donnschtig, 24. Juni 2021 de Beat Brändli ion Pflicht gnoh worde. Hinter ihm het es numme no föif potentielli Ersatzlüt, vo ursprünglich 30 Kandidierende. Di zwöitgröschti Iiwohnerrotspartei, d SVP, het sit em 1. Januar 2018 drü Rücktritt und ein Todesfall z verzeichne gha. D Partei hetti no sächs Lüt uf de Lischte, wo chönnted nocherütsche. Bi de SP, wo im Rat nün Sitz het, sind föif Rücktritt z verzeichne gsi. Es sind also meh wi d Hälfti vo de ursprünglich gwählte nümm derbi und es währed numme no drü Ersatzkandidatinne oder -kandidate parat. Mit vier Wächsel bi sibe Sitz, het sich au d Fraktion FDP starch veränderet, wobi au vier vo de ursprüngliche no derbi sind. Grund isch, dass mit em Rudolf Rohr ein Iiwohnerrat nochegrütscht und au wider usgschide isch. D Lischte für allfälligi Nachrücker isch aber no verhältnismässig lang, isch d FDP doch mit 24 Kandidierende aaträte gsi.
Kei Wächsel hets bi de GLP geh. Di vier Gwählte sind au jetzt, churz vor de Wahle, no alli im Amt. Genau gegeteilig isch d Entwicklig bi de EVP gsi, wo bi drü Iiwohnerröt drü Wächsel gha het, wobi au da mit de Marie-Madeleine Minder e Iiwohnerrötin nochegrütscht und au wider us em Rat usträte isch. Hinter em Christoph Fäs, wo für d Marie-Madeleine Minder in de Rot cho isch, hets numme no ein potentielle Nochfolger. Bi de WettiGrüene, wo numme zwöi Sitz het, isch es zu eim Wächsel cho und au bim Forum 5430, wo im September nümm zu de Wahl aatritt, het ein Iiwohnerrot müesse ersetzt werde.
Me dörf gspannd si, wie viel vo de 28 Iiwohnerrötinne und Iiwohnerröt, wo mindescht scho am Aafang vo de Legislatur im Rat si gsi, nach de Wahle im September wider werded debi si. Scho ellei wil nüm alli werded bi de Wahle aaträte, wird d Aazahl vo dene, wo meh wi 4 Johr derbi sind, witer zruck goh. Uf de andere Site git es mit em Leo Scherer es Ratsmitglied, wo scho über 30 Johr debi isch und es git mindest 4 witeri, wo scho meh wi 10 Johr «uf em Buckel» hend.