Offiziell isch es de Schwiizer Grossfäld-Cup, wo de SV Lägere Handball geschter uf em Scharte gwonne het. Wills aber de einzig Wettbewerb für d Grossfeldhandballer uf Landesebeni isch, isch es d Schwiizermeisterschaft, wo d Wettiger gwonne hend!
Acht Teams sind es gsi, wo am Sunntig, 27. Juni 2021 am Vormittag ermittelt hend, welli vier am Nomittag ide Finalspiel um de Cupsieg hend dörfe spiele. I de Gruppe 1 hend sich debi die iheimische vom SV Lägere mit 3 Sieg sicher qualifiziert und Biel isch als zwoiti mit i die Finalspiele cho. Vo de andere Gruppe sind das Appezell und Horge/Wädeswil gsi.
Im erschte Match het de SV Lägere unglücklich gespielt und gegen Appezell verloren. Scho händ alli gemeint, das es jetzt mit de Titelverteidigung verbii isch. Zum Glück het Biel, wo es paar Aargauer im Team gha het, de Wettiger gholfe und Appenzell gschlage. So isch es im letzte Spiel vom Tag für d’ Wettiger um alles gange und sie hend müesse mit mindestens 3 Goal gäge Horge/Wädeswil gwünne. Das händ d Frau und Manne vom SV Lägere mit Bravour gmacht und de Sieg mit 13:5 heitreit. So het de Gastgeber sind Titel erfolgrich verteidigt und isch wider Schwiizer Grossfeld-Cup-Sieger.