De Lukas Wampfler kandidiert wider als Ersatzmitglied vo de Stüürkommission und au die drü bisherige Iiwohnerröt vo de EVP träted wider aa. Ergänzd wird d Lischte für d Wahle vom Iiwohnerrot durch drü Fraue und vier Manne.
Am 26. September 2021 finded z Wettige die kommunale Wahle statt. Nebem Gmeinderot werded au de Iiwohnerrot und d Stüürkommission noi gwählt. D EVP het bi de Nomninationsversammlig für d Wahl vom Iiwohnerrot zeh Kandidatinne und Kandidate nominiert. Nebe de Bisherige, em Lutz Fischer-Lamprecht (Iiwohnerrotsvizepräsident), em Lukas Rechsteiner (Mitglied vo de Gschäftsprüefigskommission) und em Christoph Fäs, träted au zwöi Alt-Einwohnerrötinne aa: d Margrit Wahrstätter, die bisher einzig Iiwohnerrotspräsidenti vo Wettige und Helen Suter, wo zudem politischi Erfahrig us de Schuelpfläg mitbringt. Ergänzt wird d Lischte vo de EVP dur de Daniel Anner, de Bernd Gellert, de Marco Muntwyler, d Christine Niesen und de Jay Padiyath, Mönsche, wo en riiche Erfahrigsschatz us Bruef und gsellschaftlichem Engagement mitbringed. Alli zeh sind bi de Wahl, wo de Alt-Vizeamme Heiner Studer gleitetet het, eistimmig nominiert worde. D Versammlig het zudem em Vorstand vo de Regionalpartei Wettige-Limmattal d Kompetenz geh, allfälligi Nachnominierige vorzneh.
Bsunders wegem Rückzug vom Forum 5430 het sich d Partei es höchs Ziel gsetzt: «Mir wend en vierte Sitz, zum en eigedi Fraktion chönne z bilde», so Parteipräsident Lutz Fischer-Lamprecht zu de aawesende Kandidierende und Parteimitglieder: «Ich bin überzügd, dass mir das Ziel miteme engagierte Wahlkampf erreiche chönnd.»
Als Ersatzmitglied vo de Stüürkommission isch de Lukas Wampfler, wo das Amt scho sit vier Johr duet usüebe, ebefalls eistimmig nominiert worde.