I de Nacht uf hüt, Mittwoch, 16. Juni 2021 het di Mobil Einsatzpolizei uf de A1 z Noiehof e Grosskontrolle duregfühert. Es Auto het dodebi s Haltezeiche missachtet und Kontrollstelle durchbroche.
Es isch am Mittwochmorge churz ab de Eis gsi, wo en Citroën uf de A1 in Fahrrichtig Bärn unterwägs gsi und in d Kontrolle vo de Mobile Einsatzpolizei cho isch. De 28-jährig Automobilist het uf s Haltezeiche ned reagiert und isch eifach witergfahre. D Polizei isch em hinterher und het s Auto in de Folg chönne aahalte. De Fahrer, aber au de Bi- und de Mitfahrer sind dann für witeri Abklärige mit uf de Stützpunkt gnoh worde. Mitteild het d Kantonspolizei, dass s Fahrzüg bis zum Rastplaltz Würelos vomene 29-jährige Mazedonier glenkt worde isch. Uf de Fahrt isch es schint zueme Strit zwüsche de Kollege cho, so dass si z Würelos aaghalte hend und en Fahrerwächsel gmachd hend. De 28-jährig Schwiizer, wo ab em Fressbalke s Fahrzüg glenkt het, het dann d Grosskontrolle durchbroche. D Staatsaawaltschaft het e Strofuntersuechig iigleitet und bi beide Lenker e Bluet- und Urinprob aagordned. D Fahruswiis hend au beidi müesse abgeh.