De Otto Sigg het mit eme Buech über d Hexeverfolgig in de Grafschaft Bade d Erinnerig an di betroffene Fraue welle fördere und es Mahnmal setze. Eini vo de betroffene Wettiger Fraue, d Regula Zimmermann, isch am 18. Mai 1616, also hüt vor 450 Johr, zum Tod verurteilt worde.
Wie viel Frau im vom 15. bis ins 17. Johrhundert zum Opfer gfalle sind, isch ned bekannt, au ned für di alti Grafschaft Bade. Us de alte Grichtsakte, wo im Staatsarchiv z Aarau ufbewahrt werde (Aktebänd AA 2602 und AA 2602a), het de Otto Sigg d Grichtsakte vo 59 Frau zämmegstelle und veröffentlicht. Zwei devo, d Anndli Wild und d Regula Zimmermann sind vo Wettige gsi.
De Prozess gege d Regula Zimmermann het am 18. Mai 1616 stattgfunde. D Landrichter sind nach de Grichtsakte de Jakob Büel, de Heinrich Bachmann, de Jakob Waffenschmidt, de Hans Heinrich Zimmermann, de Thomma Gross, de Jagli Roner, de Rudi Locher, de Kaspar Widerkehr, de Kleinhans Ernst, de Hans Spörri, de Jagli Müller, de Heinrich Roner, de Kaspar Staublin und de Hans Keusch gsi, alli Untervögt oder Vögt us de Grafschaft.
Wi allewyl in dere Ziit, isch s Gständnis, wo für en Verurteilig notwendig gsi sich, mit Folter erzwunge worde. Au d Vorwürf sid di übliche gsi: Gschlechtsvercher mit em Tüfel, d Verlügnig vo Gott und de Heilige und s Verderbe über Lüt und Vieh brochd z ha.
Durch es einstimmigs Urteil vo de Landrichter, isch d Regula Zimmermann zum Füürtod verurteilt worde und entweder am gliiche oder an eim vo de nächschte Täg higrichtet worde. Im Urteil isch au e nachträglichi «Begnadigung» überliefered, so dass si vor em Verbrönne enthauptet worde isch.