Uf de Chrüzig, wo de berühmt-berüchtigt Minichreisel anne chunnd und a de Etzelstrass Richtig Berninastrass, sell am Mentig, 17. Mai 2021 de Deckbelag iibaud werde. De Strasseabschnitt wird vom Mentig um 7i bis am Tsischtig um 7i gsperrt.
D Bauarbeite in de Bernina- und Etzelstrass und bi de Chrüzig Etzel-/Lägere-/Säntisstrass laufed sit Ändi Januar 2021. Wenns Wetter de Planige kein Strich durch d Rechnig machd, dann wird i dem erschte Abschnitt vo de Sanierig am Mentig, de Belag iibaud. Dodefür muess de Abschnitt vo de Etzelstrass ab de Berninastrass und d Chrüzig für 24 Stund gschperrt werde.
Numme Fuessgänger chönnd passiere und Velofahrer sind ufgfordered, d Velo im Baustelleberich z stosse, schribd d Gmeind in ere Mitteilig. D Zuefahrte bis zu de Baustell werde vo allne Site offe ghalte.
Bsunders betont d Gmeind folgendi Pünkt:
- D Ligeschafte sind z Fuess jederzit z erreiche.
- D Zuelieferig mittels LKW isch i dem Ziitruum ned mögli.
- D Fahrzüüg müend vor em Baubeginn us em Baustelleberich entfernt und uf de öffentliche Parkplätze innerhalb vo de blaue Zone abgstellt werde.
- Trotz Baustelle gilt in de Etzelstrass witerhin s Strasseverchersgsetz mit de Verchersregeligsverordnig. Bsunders betond d Gmeind, dass e Durchfahrtsbreiti vo mindest 3 Meter jederzit muess gwährleischtet si und s Parkiere uf Strasseverzwigige und 5 Meter devor und danach verbote isch.
