En gwössi Normalität chert au am Wettiger Bächliwäg weder ii…oder s «Läbe vonere Sitzbank».
Noch langer Ziit ben ich weder a min alte Platz am Bächliwäg under de Kaschtaniebäum zrugg brocht ond montiert worde. Ich liebe min Ort, a dem ich so veelne Mänsche d Möglichkeit gebe, sech för en Augeblick uszruehe ond uf mir nederzloh.
Bi mer chan sech jede vo de Alltagshektik erhole, die suuberi Luft iatme und em plätschere vom Bächli zuelose.
Was han ich alles för luschtigi Gschichte ghört, Liebespäärli bi ehrem erschte Date en Sitzglägeheit anerbote oder mech eifach gfreut, dass mer in Wettige so vell schöni Plätz händ.
Danke allne, wo mech wieterhin met Respekt nutzed, ohni Joint-Näbel um mech ome, ond ohni luuti Boom-Boom-Musig. Min Nochberskumpel, de Abfallhai, freut sech au, wenn er gnutzt wird, damit d Bauamt-Mitarbeiter ned emmer alle Mischt um mech ome müend müehsam vom Bode zämeläse.
Ich freu mi jetzt scho weder uf tolli Begägnige. Velecht met de einte oder andere Läbensgschicht? Si esch bi mer uf jede Fall guet ufghobe!
Herzlichscht, d Sitzbank vom Bächliwäg… (UD)