Am 3. September 2020 finded wege Corona zum dritte Mal en Iiwohnerratssitzig im Tägi statt. Es goht u.a. um es Füürwehrfahrzüüg und Teiländerige vo de Bau- und Nutzigsordnig (BNO).
Wil de notwenig Abstand im Ratssaal im Rathuus ned cha iighalte werde, trifft sich de Iiwohnerrat au hüt zur 5. Sitzig im 2020 im Sall vom Tägi. En Blick in d Fraktionsbricht zeiged, dass vili Traktande unbestritte sind.
Bim neue Pikettfahrzüüg für d Füürwehr esch unbestritte, dass es das Fahrzüüg bruuchd. Diskussione dörfts drüber geh, wi vil vom bisherige Material ufs neu Fahrzüüg zügled wird und wi vil set ersetzt werde. Au d Teilrevisione vo de BNO für de Bahnhof, d Tägerhardstrass und d Chlosterhalbinsle schined unbestritte. Anderscht gsehts bim Ruhegehalt für de Gmeindamme us und bi diverse Vorstöss, wo de Rat behandle wird.
Zueschauer sind übrigens au im Tägi willkomme, finded Iiwohnerratssitzig jo grundsätzlich öffentlich statt.