![Renata Siegrist und Roland Kuster bi de Bundesfiir Bundesffir 2019](https://wettiger-nochrichte.ch/wp-content/uploads/2019/08/img_20190801_1237071309833362567138446-678x381.jpg)
Wege de Vorgabe zur Bekämpfig vo de Corona-Pandemie het d Gmeind d Bundesfiir 2020 abgsaid. Das schribt si innere Mediemitteilig.
Durch d Lockerige vo de Massnahme sind in de Zwüscheziit Gruppegrössene bis 300 Lüt erlaubd. Das langed aber ned für d Bundesfiir, wo d Erfahrigswert bi öppe doppelt so vil Bsuecherinne und Bsuecher liged. Di nächschte Lockerigsschritt het de Bundesrat für Endi Juni aakünd. D Vorbereitig, wo au finanziell Verpflichtige notwendig mached, müessted zueme Zitpunkt starte, a dem ned klar isch, ob de Aalass cha stattfinde.
Traditionell chund ja de Präsident oder d Präsidentin vom Grosse Rat uf Wettige, um d Fäschtred z halte. Di Tradition wird au im 2020 uf recht erhalte, i dem d Grossratspräsidentin, d Edith Saner vo Birmischtorf, e Videobotschaft für d Wettigerinne und d Wettiger wird ufneh.