D «Atmosphäre», s grosse Fäscht, bi dem me s 975-jährig vo Wettige het welle fiire, wird ersatzlos gstriche. S wirtschaftlichi Risiko vonere Verschiebig isch z gross!
Es isch en harter Schlag, für alli, wo sich uf s grosse Jubiläumsfäscht gfreut hend. Au d Hoffnig uf e Verschiebig uf 2021 het sich zerschlage. E entsprächendi Erklärig, wo vom Co-Präsidium und em Gmeindamme zeichned isch, isch uf de Website vom Jubiläumsfäscht z finde.
Es isch em OK ned licht gfalle, den Entscheid z träffe, aber s wirtschaftlich Risiko von ere Durchfüehrig im 2021 sig ned kalkulierbar, so isch dete z laese. Au wenn es en harter Schlag für alli Beteiligde isch, sig de Entscheid im Organisationskomitee einstimmig gfalle. D Unsicherheit, wo s Virus, wo Covid-19 verursachd, in oises Läbe brochd het, wird ois uf unbestimmti Zit begleite, was es seriöses Budget und en Zitplan, wo für d Betriiber umsetzbar wär, verhindered.
S OK wird jetzt en «geordnete Rückzug» iileite. S goht drum, di finanzielle Mittel, wo scho gflosse sind, transparent ufzzeige und, so wit mögli, zruckzahle. Das wird aber Ziit in Aaspruch neh, so dass s OK um Geduld bitted.
Us oisere Sicht gebührt em OK und de Beizebetriiber, und allne, wo an de Vorbereitige beteiliged si gsi, en grosse Dank. Vil Zit und Energie isch in das Projekt gsteckt worde, wo jetzt für nüd isch.