Mitti Juni sind di beide Rothuusuhre abmontiird worde. Jetzt sind si mit noiem Uhrwerk und e paar andere Noierige zruck.
Es sind dütlich meh wi di ursprünglich aakündigde acht Woche gsi, wo d Revision vo de Uhre duured het. De Grund sind schints Bauteili gsi, wo d Firma Mobatime, wo d Revision duregführt het, ned so schnell übecho het, wi erwartet. Nach ned ganz 15 Woche sind di noie Uhre am Tsischtig, 24. September 2019 wider montiird worde.
Di beide noie Uhrwerk sind praktisch identisch mit de alte. Statt em mechanische Speicherwerk gits noi es elektronischs. Das speichered bieme Stromusfall d Ziit bis zu 24 Stund und cha, we de Strom wider do isch, d Zeiger wider i di richtig Position bringe. D Uhre gönd im Normalfall sehr exakt, au wenns kei Funkuhre sind. Di funkgstüüred Muetteruhr isch nämli im Keller vom Rothuus und alli 200 Millisekunde gits en Impuls zur Synchronisation vo de Ziit,
Di alti Uhr het fascht 60 Johr ghebd und au di noi set öppe so lang chönne laufe. Di noi Uhr spart im Vergliich zu de alte Strom, so dass si ökologischer isch. Statt de alte FL-Lüchte sind jetzt LED iibaud, wo au bi Dunkelheit erlaubed, d Ziit abzläse. So set di Uhr mit em 180 Zentimeter Durchmesser allne, wo si vermisst hend, für langi Ziit zueverlässig d Ziit aazeige.