65 Chind hend im reformiirte Chilegmeindhuus es Domino-Spektakel inszeniird. D Kolibritäg vo de Reformiirte Chilegmeinde Wettige-Noiehof und Würelos sind wider en Erfolg gsi.
D Chind vom grosse «Chindsgi» bis zu de 5. Klass, wo zu de Domino-Täg sind iglade gsi, hend i de letschte Woche viel erläbt. Nebem Baue vo Domino-Schlangen und -Skulpturen hend sich di Teilnehmende z. B. mit em Bau vo Chügelibahne oder em Backe oder Baschtel vo Domino-Stein. Si hend sich in Gruppestrategie im Geländespiel und de Leiterjagd güebt.
D Handpuppe Lily het d Härze vo de Chind genau so gwonne wi s Filmteam, wo sich zämme mit de Zueschauer vom Theater uf d Suechi nach em rote Fade durch di Bibel gmachd het. D Fahndig isch nach em Plenum jewils in Chligruppene vertüft worde.
Bim Z’Mittag isch nebem Ässe au d Begeischterig teild worde. D Stimmung isch vo Tag zu Tag usglassener worde und het am Sunntig ihre Höhepunkt erreichd, wo d Bsuecher vom Familiegottesdienscht de Wettlauf vo de Stei erwarted und mit vil Applaus begleited hend.