S Badener Tagblatt schriibd in de hütige Printusgab über Schuele, wo es Flugverbot für Klassereise erloh hend. Mir hend vom Rektor vo de Kanti Wettige, em Paul Zübli welle wüsse, wi es do bi ois ghandhabt wird.
Grad voreweg: De Paul Zübli halted nüd vomene Flugverbot. Es sig vo einige LehrerInne gfordered worde, aber vo de Schuelleitig abglehnt, so schriibd er uf oisiri Aafrog. D Kanti wot niemed zum Flüge zwinge, aber au ned d Rolle vo strenge Eltere überneh. So blibt es en Entscheid vo de einzelne Klasse, wi si bi ihrne Klassereise de Ziilort erreiched. Ei Bedingig gäbs aber für Flugreise: Si müend bi myclimate kompensiirt werde. Oisi Rückfrog, ob das ned eme Ablasshandel gliich chämti het er gmeind, d Schuel sig ja ineme ehemolige Chloschter unterbrochd 😉
Zudem betond de Zübli, dass s Klima es wichtigs Thema im Geographiiunterricht sig und au de Klimawandel scho sit Johre im Unterricht thematisiird würd. Wivil Wettiger KantischüelerInne am Klimastreik teilnehmed, het er ned chönne säge, aber vo Bade und Wettige zämme sigeds bi de letschte grosse Demo öppe 350 Persone gsi.