Slowenie ischs Gaschtland bim disjöhrige Weltgebetstag (WGT) gsi. D Botschafteri Marta Kos het das Land so charmant und interessant vorgschtellt, das vili danach gsaid hend, si wend s Land ubedingd emol go bereise.
Dass d Botschafteri vo de Republik Slowenie z Bärn, d Marta Kos persönlich uf Wettige cho isch, isch de Maja Padiyath z verdanke gsi. Si hetti eifach als erschti gfröged und nach em „Ja“ vo de Marta Kos isch es bim „Ja“ blibe, au wenn si no vili witeri Aafroge übercho het, u. a. Au vonere grosse Chile z Züri. Für d Bsuecherinne und Bsuecher, da drunter zwöi Gmeindröt, und s Vorbereitigsteam vom WGT i de reformiirte Chile, isch de Bsuech e grossi Froid gsi.
Aber eifach gschtumme het au alles anderi. D Liturgii isch iidrücklich gsi, d Musik het d Härze berührt und de kulinarisch Abschluss isch phantastisch gsi. Gfählt het allefalls de Wy, wo vorher bim Gottesdienscht e Rolle gschpild het, isch doch d Nationalhymne vo Slowenie d 7. Strophe voneme Trinkliid.
Wer d Musik und d Vorschtellig vom Land wot uf sich wirke lah, cha oises Video aaluege. Es isch aber e chli länger worde, bsunders wil mir d Red vo de Marta Kos ned hend welle chürze: