De Toni Businger isch gstorbe – en Nochruef

Unvergässe isch d Fahne, wo de Toni Businger fürs Jubiläum vo Wettige im 1995 entworfe het.

Am Fritig, 15. Februar 2019 isch de renomiirt Bühnebildner und
Künschtler Toni Businger z Bade verschtorbe. Wältwiit hed er Bühnebilder
für unzähligi Schauspiilhüüser gschaffe. Bsunders
ufsehenerregendi für dSeebühni vo de Bregenzer Fäschtspil.
Gebore und ufgwachse isch de Toni Businger z Wettige und het hiir au d
Primar- und d Bezriksschuel bsuechd. Danach hed er d’Matura im
Kapuziner-Kollegium St. Fidelis abgschlosse. Aaschlüssend het er es
Literaturstudium a de Uni Züri aagfange, wo er aber nach 3 Mönet
abbroche het zum id Provence go male.
Sis Interesse het scho früeh em Theater golte. Scho als Schüeler isch er
vil im Kurtheater Bade gsi, het d Stück im Vorfäld gläse und sich e Vision
gmachd, im Kollegi z’Stans heder dörfe sis erste Bühnebild für «Emil und
die Detektive» gstalte.
Für sin bruefliche Werdegang als Büehnebildner isch d Begegnig mit em
Teo Otto entscheidend gsi. Der isch beiidruckt gsi vo de Bilder us
Südfrankriich und hed ihm d’Assistentestell ahbotte. Im 1957 hed er
d’Chance becho sis erschti Büehnebild für s Stuck «Und Pippa tanzt» vom
Gerhart Hauptmann z’entwerfe, wo im Schauspiilhuus z Züri ufgführt
worde isch.
Als freischaffende Bühnebildner hed er u.a am Operehuus Züri, Genf,
Brüssel, Berlin, Dresden, Leipzig, Hamburg, Münche, Wien, Paris,
Amsterdam, Lissabon, Barcelona und Madrid gschaffed. Sis Debüt i de
USA het er im 1966 a de San Francisco Opera gha. Dete isch ihm mit em
Bühnebild für «D Zauberflöte» vom Mozart de Durchbruch zunere
internationale Karriere glunge. Au in Kanada, Südafrika und Südamerika
isch sini Kunscht gfröged gsi. Vo 1972 bis 1979 het er d Usstattig für
d’Seebühni ade Bregenzer Fäschtspil entworfe, wo für ihri spektakuläre
Bühnbilder bekannt isch.
Fürs Jubiläum «950 Johr Wettige», wo vom 23. Juni bis zum 2. Juli im
1995 gfiired worde isch, het er s Signet und d Fahne entworfe. Im 2005
het ihm sini Heimatgmeind Wettige s Ehrebürgerrächt verliehe.
Mit em Toni Businger verliird Wettige sin renomirteschte Künschtler!

De Abdankigsgottesdienst finded am Fritig, 8. März
2019 um Drü am Namittag i de Chloschterchile Wettige statt. De Drissigscht isch am Samschtig, 16. März 2019 um Halbisächsi am Abe in de Pfarrchile St. Sebastian.