Gohts Ufruume bim Murihof los?

Bim Murihof stoht sit geschter, Fritig, 15. Februar 2019 e Mulde. Di wo ufs grossi Ufruume bi dem Schandfläck zmitts im Dorf hoffed, müend mir aber enttüsche.

Sit em Iisturz voneme grosse Teil vom Murihof gits dete en Baustopp. De Aablick machd eigetlich niemed e Froid, aber Baustopp bedüted schints au, dass me ned dörf ufruume. E Mulde wo geschter uf em Areal vom Murihof platziird worde isch, het bi manche Hoffnig geweckt, dass es besser wird. Nach oise Recherche het di Mulde aber nüd mit em Murihof z due, sondern stoht im Zammehang mit ere Ruumig a de Dorfstross 30. Oisi Aafrog bi de Gmeind, ob es rächtlich korrekt isch, ufeme Gländ mit Baustopp e Mulde z stelle isch wege Ferie und Wocheänd no hängig, aber mir informiired, sobald ois Informatione vorliged.