D‘ SVP Wettinge het für Fründ und Mitglider am letzte Samschtig e Boustellebesichtigung vom neue Tägi organisiert. Es het dete interessanti Iiblick in di Grossboustell geh.
Bi strahlendem Sonneschiin het de Jürg Bischof vo de Bou- ond Planigsabteilig vo de Gmeind Wettinge e stattlichi Bsuecherschar uf de Tägi-Boustell begrüesse döfe. Er het sine Gäst mängi spannendi Anekdote über d‘ Useforderige vom Neubou z’verzelle gwüsst. Im Aschluss a d‘Besichtigung händ sich d‘Fründ ond Mitglieder vo de SVP-Ortspartei Wettinge uf e Wäg zom Burehof vo de Familie Meier gmacht. Uf em Hof vom SVP-Iiwohnerrat Stefan Meier händ mer bi feinem Wettiger Wii d‘Köstlichkeite us em eigene Abau vo de Familie Meier döfe gnüsse. Öise Iinwohnerrat Thomas Wolf het för d‘Gäscht tolli Sache grilliert. Di Teilnähmende händ sich bi Spiis ond Trank a de schöne Umgebig ond guete Gspröch erfreut.