Wils Windstill gsi isch, isch de Waldbrand z Noiehof glimpflich usgange

Vorgeschter hets im Noiehofer Wald brönnd. Wils nöd gwindet het, de Wald nümm ganz eso troche gsi isch wi in de Mönet und wegem beherzte Iigrife vo de Füürwehr Noiehof halted sich d Schäde im Rahmen.

Es isch es Holzlager vo öppe 10 uf 10 Meter gsi, wo vorgschter, 9. September 2018 im Wald oberhalb vo Noiehof in Brand grate isch. Schnell isch d Füürwehr alarmiird gsi und zum Lösche usgrückt. Au wenn de Brand selber nöd eso gross und au nöd eso ufwändig zum Lösche gsi isch, so sind di 35 Füürwehrlüt doch vor einige Herusforderige gschtande. De Wassertransport vom nächschte Hydrant, wo öppe 750 Meter ewäg gsi isch, het bis zum Tanklöschfahrzüüg (TLF) müesse sichergstellt werde. Wäge de Längi vo de Leitig und em Höheunterschiid hets dazwische zwei Motorsprütze bruuchd, um en usreichende Druck z erzüge.
Fürs Lösche und s Retabliire het d Füürwehr en föifstündige Iisatz müesse leischte.
Im Gschpöch über de Iisatz mit em Noiehofer Füürwehrkommandant , em Daniel Burger, het er ois ans Härz glegd z betone, dass immer noch d Gfahrestufe 3 gilt, d Waldbrandgfahr also immer no «erheblich» isch.
Folgedi Regle müend beachtet werde:

  • Kein brönnendi Raucherware und Zündhölzli fortrühre.
  • Im Wald numme in feschte Füurschtelle füüre.
  • Füür immer beufsichtige und bi starkem Wind und/oder Funkeflug sofort lösche.
  • Füür immer ganz lösche, bevor me vo de Füürstell ewäg goht.
  • Kei Abbrönne vo Schlagabruum im Wald.