Hüt, Donnschtig, 6. September 2018 isch di 5. Sitzig vom Iiwohnerrot. Vor allem ein Paragraph im Parkiirigsreglement stört di bürgerliche Fraktione vom Iiwohnerrot.
Abgseh vo de SVP, wo in ihrem Fraktionsbricht vo Lücke und Fähler in de noie Gebühreordnige schriibd, stönd d Fraktione vom Iiwohnerrot em Parkiirigsreglement wohlwollend gegenüber. Abgseh vom §14bis! Dete heissts im vom Gmeindrat vorgschlagene Tekscht in de Absätz 1 und 2, dass allgemein zugänglichi noii und bestehendi privati Parkiirigsaalage, gmeind sind Kundeparkfälder, bewirtschaftet werde müend. Das gilt aber numme für Parkiirigsaalage mit meh wi 20 Parkplätz, wo rüümlich und funktional zämmehange. D Fraktion FDP empfinded das als unnötigi Stei, wo em Gwerb in de Wäg glegd werde und d CVP schriibd vomene graviirende Iigriff ins Grundeigetum und d Wirtschaftsfreiheit. Wenn alli drü Fraktione gschlosse gege de §14bis stimmed, dann wird er abglehnd, au wenn d Fraktione EVP/Forum 5430, glp und SP/WettiGrüen Zustimmig signalisiired.